(a Ofi )

Mancari cussu…
fenas si unu mare de ludu
t’apat chèrfidu arrogliare
che canes ch’arrógliant anzones
mancari cussu…
e sas tràchidas de coro
s’acorrant in bula
tochedant su cherveddu
che irmermeddu ch’istampat su pessu
o revessu crau ‘e frailagliu
pistadu dae mazolu ‘e marra
ch’intrat in carres
las fertat
las punghet
e nuscos aturrados de pedde
prenant e ghissant dae s’amima Tua

Mancari cussu…
custos póddighes meos
t’allisant e si perdent in carignos
intre pilos tuos
subra de lisas peddes
chi su tempus pijat e annoat

mancari cussu…
che lizu in s’ata de mare froris
e gramas
chin lìmpios allàmbrios
chircas in s’irmurinada die
brandos lugores
e intinos de vida…

mancari cussu.

Torpè 25/03/2014