Intonade sonadores
sonos angelicamente
e cantade dignamente
custa ninfa, o cantadores.

Si canto es chi meritas
innos de una matrona,
ca sas ninfas d'Elicona
in bellesa asa imittadu.
Sa dea Venus ti a dadu
colores e biancura;
su trattu, sa cumpultura
tenes de Elena troiana.
Su retrattu de Diana
tue asa imittadu ancora.
Tue ses noa Pandora
chi d'ogni grascia asa in manu,
tue d'ogni cristianu,
podes bocchire e sanare;
tue solu podes dare
a sos defuntos sa vida.
Faghe chi sia finida
custa pena de s'amore,
calmami custu dolore,
Ginona mia istimada,
ca dai cando ses nada
su coru meu asa in sinu,
e, senza coro, mischinu
pruite mi cheres lassare?
Pensa de mi lu torrare,
no sias tantu inumana,
no sias gai tirana
de mi occhire innozzente.

Intonade sonadores
sonos angelicamente
e cantade dignamente
custa ninfa, o cantadores.