ISETENDE S'AMORE
Di Lorenzo Brandinu

Ite mi restat de cuddos abratzos
cuddos carignos furaos in presse
da chi su tempus girat a s'imbesse
distrutos e ridotos che istratzos

sos designos sos sonnios de bida
pintaos a s'iscuru in d'un androne
ch'illughinavan in sa passione
vibrantes de amore e de isfida

sunu finidas sas bonas isperas
sa dulcura sos risos passionales
sos brincos chin sos bolos irreales
ca sun iscurigadas sas aeras

totu at mudadu in custa bida mia
innestande sa pranta 'e sa tristura
chi portat solu frutos d'amargura
ma non mudan sos canticos d'istrìa

ca su tempus dezidit sa fortuna
medas bortas istruncat sa vijone
chin sas francas ferozes de leone
sind'istudat sa bida totu in d'una

ateras pro nde fagher ballentìa
nd'isperriolat bidas e afetos
e cancellat dulcuras e segretos
sos sonnios d'ispera e fantasia

corpit e ferit chin fagher sicuru
non curat sos piantos e lamentos
chi prestu los isperdene sos bentos
e nde lassan sos coros a s'iscuru

chircande dolu a s'anima ferida
so restadu in tristura e disconsolu
dae su die c'at picau su bolu
sun tzessados sos gosos de sa bida

ma su lumene sonat in s'altura
prus arta in s'universu planetariu
isetande su bolu a s'incontrariu
chi mi rendat s' amada criadura

e su lumene sico a lu giamare
senza risposta in s'aghera iscunserta
in cala che ferida thilicherta
minde torro su sole a isetare

Segnalazione concorso Sedilo 2019