Isettende sa paghe
di Sebastiano Bosu

Bentos de gherra,
traschias malinnas
dannosas,
abbolotan sas bideas,
e truncan in su nascher
s'isperanzia
de chie fittianu
invanu pregada,
isettende sa paghe.
Dae su cherrer
de pagos cainos
ch'inchesu han sas lumeras
dae sas frammas alluttas,
inferru 'e tantos frades
chi pedini azutoriu,
dolidores de fertas e piaes
sos lamentos intendo.
Peleo e ligo a fasche
fiores e ispinas maleittas
pro istudare fogu.
Isettende sa paghe,
sas dies fuidittas
s'irghelan in s'iscuru,
che crabolas arestes,
cando est sero,
in su padente ispozu,
ue su frittu punghede
a su costadu
che unu Longinu,
fattende eterna sa notte
a passare.
Tando in brenugos prego
e canto cun s'ispera
chi s'ammuden sos bentos
e cando avreschet crasa
sos ojos de su mundu
pottan bidere
torrende in s’orizonte
lunghe de tanta paghe
a sos viventes.