Ispera chenza logu...
di Gigi Angeli

Altivu no' nde sò 'e sa "libertade"
ch'hapo, ma chi in atteros no' bido
cando che da-e unu sonniu, m'ischido
bidende criaduras in cadenas;
zididas gasi in manos anzenas
dai 'endiolos de umanidade.

O cando de sa pedde sos colores
son' bessu pro ispaltire diffarenscja
pro chie 'e "Soddu" faghe' sa potenscja
de s'istimada sua "ziviltade";
mirat a custa sola galidade
boghendeche a barattu sos valores.

E piccian' gherras pro … su "Deu Mercadu"!?!
comente "umanitarias" beneittas,
de luas pregnas porrini sas tittas;
e si de balla che l'has'isfrancada
sa morte, ti tentada impostada
cando 'essis' da 'ue ti fis' cuadu.

In sa 'adde manna 'e su disvariu,
tra chie ista bene e chie pena' vida,
una frina si pesada imbonida
de coros d'oro: su "volontariadu";
parene medas in su ighinadu
ma pagas … pro custu mundu in variu.

Si fodzini sas piantas de inghjustiscja
e in donzi logu sighini a brottare,
diad'esse bonu prou las ischimare
si no' a-nde degumare sa raighina!?!
ma sa afficada nd'essidi mischina
cunfrontada a sas reulas de maliscja.

In custu paltu mannu 'e mala cria
sa piedade porri' paga cosa;
puru sa caridade 'essi pilosa
cando a la dare est chie pone' fogu.
Cantu a "s'ispera," lea' pagu logu:
tantu cant'hàda …in custa poesia.