Torradu est maju pomposu
Cun sos nuscos de amores,
Incoronat isposa eisposu
Cun prommissas e fiores !

Deo isposa ‘e maju in s’altare
Amore a tie apo giuradu,
In su bonu e malu passare
Finas a morte t’apo amadu !

Nida fia e frisca rosa,
Cando in sonnios not’e die
Nudda ischia de ogni cosa
Ma: a tie cheriat affaca a mie !

Como sa bida mia passo
Faeddende.mi a sa sola,
Totu chirco e totu lasso
Partzo sighende una fola !

Torro in segus a caminu
Senza fiores e nen gloria,
Intzisu apo in sa memoria
Su meu , e su tou destinu!

Tue ses como a s’àter’ala
E deo so isfainada;
Morta parzo e sepùltada
Cun sa rughe mia a pala !

Narami ite nche fato inoghe?
Non bido prus su pro ite!
No apo nen risu nen boghe
No isco ite male nd’ischite !

Dae sa die chi m’as lassadu
Pro ogni cosa m’addoloro,
Su tempus nostru est andadu
E presu a tie m’at su coro !