Istajones
di Gonario Carta Brocca

Epuru nou
intonadu chin s'arpa de su coro:
unu drinnire de lampizos d'oro
beraniles
chi sa janna 'e sos bisos aperiat.

Como
s'est fata prantarìta
cuss'antiga cantzone
e bolat
imbriaga de vida
peri chelos in muda
in d-un'eterna chirca
de pruddedos de fogu
e sos tintinnos d'un'antigu jogu
chi de frores nuscosos
e marfiliu
sa cara li mudain.

Ma frutos crompidos
los at fatos s'istade
e sa frina
sero sero lis dat unu carignu
a sas primas friscuras de s'atonzu.

Su tempus
bestidu de cardanas e de nie
in tundu m'at balladu
pintandemi sos pilos de biancu;
epuru
apo 'ahi un'iscusorzu...
un'iscusorzu mannu
(siendas de una vida in cumonìa)
che rechillias collidas
in s'aposentu 'onu
e che a tando
aperzo sa janna de sa note
e mi perdo
in sa mirada 'e sonajolos d'oro.

1° PREMIO - POESIA SENZA RIMA AL PREMIO POESIA SARDA DELLE ACLI DELLA SARDEGNA - XXII EDIZIONE, 2010