Istasones e dultzuras (cantigu in re)
di Giovanni Antioco Mura

Beranu chi ses torradu
pro mudare custa terra,
lasses assumancus perra
a sa nodida bellesa.

Proghì mineta e ofesa
non si mustrent atrividas,
e sas antigas feridas
ispuntent fozas che tue.

In su chelu donzi nue
non siat prus impressida,
a s’intragna torret vida
prapet timidu sicore.

Siant eternu lentore
cuddas abbas disizadas,
e i sas venas siccadas
da lambrigas e suore.

Bundent torrande colore
A lizos ogos e laras,
mudent annicadas caras
cantigos de libertade.

Chi totu s’umanidade
Mai connascat patire,
potzant de nou fiorire
arbures tristos arganos.

E sos lughidos manzanos
fizos de pasida aera,
madurent s’antiga ispera
Intro coros afrizidos.

S’anneu los at bestidos
Chena connoscher recreu,
apant dultzuras arreu
torrande gosu mancadu.

Beranu chi ses torradu.

MENZIONE ALLA X EDIZIONE DEL PREMIO LETTERARIO GURULIS VETUS DI PADRIA LA POESIA PER IL CANTO NEL RICORDO DI GAVINO DE LUNAS