ISTELLAS DE FIRMAMENTU
Luisa Scarpa Chessa

Bellu alzare sos ojos a chelu,
cando sa nott’est pasida e serena,
mizas de criaduras a cadena
si presentan festosas senza velu.

Maestosu su nostru firmamentu,
sos pianetas suos, sas istellas,
Andromeda e Antares tra sas bellas,
Cassiopea a s’Orsa Minore.

S’insoro reale esuberanzia,
a notte die mi faghen sognare,
ande si las podìa visitare,
toccarelas cun totta cunfidanzia.

S’istella mia est una criatura,
simpatica, dechida e portentosa,
ispuntat dogni sero, premurosa,
brillat pro m’ammustrare sa bellura.

Hat duos ojos giaros, su sorrisu,
sa cara ruja de incantadora,
recreu mi regalat a dogn’ora,
cust’anghelu briosu ‘e paradisu.

Unu visu serenu, armoniosu,
un’aména dulzura e simpatia,
simizat a sa cara ‘e mama mia,
cand’istracca si ponet a riposu.

Nois chi semus poveros mortales,
cand’enit s’ora su mundu lassamus,
istellas de su chelu diventamus,
schiavos de orbitas abissales.

Da-e inìe su mundu ‘idimus,
osservamus sa nostra cara zente,
mai morimus ma eternamente,
senza fastizos s’andazzu sighimus.

Astros amigos d’amor’e boutade,
s’appuntamentu a cand’enit sa die,
un’istella che bois so’ inìe,
tra babbu e mama cun felicidade.-