Ite so chilchende ite,
cando mi ponzo a pintare,
o cando pro rimare,
mi dimando pruite.

De ite so in fattu,
cun milli poesias,
si de sa faccia mia,
o atteru ritrattu.

Si pinto unu trainu,
de abbas bundanziosas,
b’hat’intro tantas cosas,
o solu su destinu.

E risposta no happo,
e sigo...sigo gai,
e chissà si mai,
su chi chilco l’acciappo.

Hada’esser sincasu,
cand’ in su colorare,
a mie gai pare(t)’,
chi b’agato su pasu.

Cando in chelos attesu,
bi pasculant sas nues,
a boltas’est’in cue,
chi eo mi sento presu.

A boltas pinto caras,
o in’iscrittu ponzo,
su chi a narrer’ bilgonzo,
ca si frimmat’in laras.

Fungutu so che lagu
e de cantu no isco,
e si inie bi pisco,
si est meda o si est pagu.

In cussu lagu... creo,
riposat’ su pruite,
de su chi chilco ite,
de su chi chilco eo!!!

Ollolai 04/12/2018