ITE BELLA CUSSORZA
Luisa Scarpa Chessa

Ite bella cussorza, fit incantu,
piena d’alvures d’ogni zenìa,
sa pius prosperosa fit s’olìa,
de ‘inzateris fieresa e bantu.

In su pastinu nou sos ozastros
devian crescher cus sa ‘ide umpare,
e-a su tempus de los innestare
fin sempre prontos artistas e mastros.

Sas bellas bides postas in filare
paris cun sas olias bettaian,
sas binzas a trint’annos si morian
como s’olìa deviat fruttare.

In pagos annos tra binza e olias
fit un accordu d’amore continu,
provvistas d’ozu sanu e bonu ‘inu
pienaian cubas e labias.

S’olia a sa zente dat recreu,
ca li regalat bonu cundimentu,
su mezus disizadu alimentu
chi a sas fizos hat donadu Deu.

Bi fit in bidda un’olì’antiga,
ch’haiat superadu sas chent’annos,
zente abituad’a fagher dannos
nos hat brujadu sa piant’amiga.

Sutta cuss’umbra frisca mi so’ ‘ida
e chentu ‘oltas b’hapo reposadu,
hapo sos sensos mios ristoradu,
serenamente mi che so’ drommida.

Como cando bi passo sa tristura,
mi ponet in su coro cuss’amentu,
no b’est s’olìa manna, su turmentu,
l’hana morta s’amada criadura!