ITE BELLESA!

Bidinde lugh’e die, a su manzanu,
chi su sole bi siat o non bi siat,
chi cheghentet, chi randinet o niat,
rispetosu mi sinno cun sa manu.

E torro grassias a Nostru Signore
po sos lugores de un’atera die,
e lu prego chi lesset sanu a mie
e a dogni innotzente pecadore.

Presoneri de custa umana giostra,
oe puru l’afronto su trabagliu
isperand’e giampiare sena incagliu
sos iscameddos de sa vida nostra.

Ite regalu mannu, ite bellesa
ca finas oe ‘idimos su lugore!
Dies de sacrifitzios e suore
ma su coro bundant’e cuntentesa!

Dies isetadas, sa ‘ona e sa mala,
chi su Signore ancora nos cuntzedit,
dies chi a betzesa ognunu pedit
cando si biet andande a s’ater’ala.

Ite bellesa, a iscurigantinu
pustis de aer fatu su dovere,
cun sos amigos tuos, a piaghere,
duos arragionos e una tatz’e ‘inu!

A or’e chena ti setzis a mesa
cun tota sa famiglia reunida
contande contos de sa die cumprida
a criaturas e mama. Ite bellesa!

Una peraula bona, duos cunsizos,
su risitu sintzeru ‘e fizos tuos,
sa bonanotte, su ‘asu a sos congruos
chi t’illebian trumentos e fastizos.

“Bonanotte”- est su saludu insoro,
“Bonanotte”- ti narat sa cussentzia.
E de custos signales in presentzia,
ca ses bonu, t’ammoddigat su coro.

Comintzàda cun d’unu sinnu ‘e rughe,
gai si che finit custa die mia,
intonande calchi pregadoria
chi finas crasa bidemus sa lughe!

Antonio Piras 30-04-2005 - Iscanu