Ite nd'addurat?
di Gianfranco Rosa

Ite nd’addurat de su chi so deo
cando mi privas, morte, de sos brios
e mind’istrazzas da mesu sos bios
nandemi: cust’est s’ora, ti che leo?
Ite nd’addurat? Invanu peleo
sende chi tostas custos nelbios mios
siccandemi de frittu sas peraulas,
ancas e brazzos tetteros che taulas!

Ite m’addurat? Ogios intzegados,
sas pettas pudrigadas e disfattas,
una lapide, folzis, cun sas datas
e pagos ossos mesu consumados;
Annos de vida an esser cancellados
da mentes impressadas e distrattas,
e sa zente ad a nascher a s’oscuru
chi so naschid’e vividu deo puru!

Cun sos miliardos de vidas passadas,
pruere cun pruere, tott’umpare
m’apo a cunfunder; m’an a cattigare
in sas carrelas ignaras peadas.
Sas pagas renas ch’an esser restadas
peri su mundu s’an a ispravinare
trazadas in sos muilos de su ’entu,
tant’e ch’ispelder cuss’ultim’ammentu.

Ma deo, da su chelu luminosu,
una die indistinta, so siguru,
ap’abbaidar’a custu mund’oscuru;
e b’ad aer un omine piedosu
ch’ad agattare unu pagu ’e gosu
legginde calchi versu meu puru.
E Deus m’ad a narrer: ses salvadu
ca in sa Terra bene b’as lassadu!