Dae s'isteddu
prus artu
vardo a ocros de luna
su ninnire assoladu'e su tramonta.

In su vasu Elicona
biazo...
in s'Universu
e chirco sittos d'oro in camineras.

Intendo zanu zanu...
su murmuttu
'e sa frina
chi ridet a sa notte
e acchirrat a lentore in sas aeras.

Intendo donzi allega
chi muilat in s'iscuru
e parpittat su coro vagabundu.

Su sole m'est amicu
a uppadas de lantias
mi caentat s'issaporzu'e s'esistenzia.

Sos chillios de su mare
isprumman chin su sale
sas boghes de sas undas
e allegan a sos montes e a sa terra.

E cammino cammino...
chin sos passos dorados
soe s'anima...chi zirat
chin su murmuttu antigu'e sas aeras
allego chin sos ocros de su entu
e biazo che lumera interi notte
chin sa cara'e sa luna.

Mi sero ins'infinidu
in sa sedda'e su tempus
sonniande sos murmuttos de sa terra

E vardo chene lacrimas s'aera
chi allattat donz'iscutta sa presenzia
inue s'iscuru pasat sa clemenzia
in sa notte'e sos tempos post'a ispera.

Primo Premio ittireddu 18-Ottobre 2015 - Sez a verso libero Matteo Spensatellu