In domo mia b’at una lumera
chi di’e note semper est atzesa,
la tenzo contu che una fortilesa,
làmpana de isetu, de ispera.

Non pro sos mortos! Lughet pro sos bios,
chi donni cosa benzat a profetu,
a passu- passu e a tretu- tretu
guidat su andar’e fizos mios.

E como ch’isetamos a Gesusu
in custas dies nòdidas de festa
cussa fiama ùmile, modesta,
paret issa chi lugat de piusu.

Fortzis su ‘entu de su Redentore
la faghet pius forte, pius bia
e totacanta custa domo mia
de calura s’intonat e colore.

Cudda lughe ch’a boltas disizamos
cando sa roda moliat a drotu,
cando su coro est in avolotu…
in su bisonzu…tando la chircamos!

Cando su ‘entu de sa malasorte
bintrat a traitorinu in domo tua,
cando su tempus tramat a sa cua
e ti pressighit finas si ses forte…

Cussa lumera mi mudat sa domo,
mi dat cunfortu, mi dat seguresa
che minoreddu a man’afuntesa.
Mìrala, est atzesa finas como!...

***
Lasso sos pensamentos e cuntzetos
pro bos augurare, a finitia,
Bona Pasca ‘e Nadale in armonia,
cun sos mezus disizos e isetos!

A totus Bonas Festas

Iscanu, Nadale 2016