La Cuntinuiddài Territoriàri
di Gigi Noce

(La proba di l’ànìu)

Signora guardia chi m’è figgiurèndi
‘chì mi soggu arriggìddu a lu marchàddu
ad aggiuddà un amiggu chi è carrèndi
un saccu mannu mannu di patàtu,
aischòlthia lu chi m’è capitàddu
la dì chi sogg’andaddu a Pratamona
a cuntimprà ”biddèzi naturari”
e ad infundìmmi un poggu la…passòna.

M’era cumpagnu un amiggu fidàri
accudìddu da Punta di Casthèddu
unu di chissi chi no ciàgga mai
e no l’ammànca zérthu lu fabèddu

Dabòi gusthaddu z’erami faraddi
a Pratamona pa la Festha Manna
v’era un futtìu di màcchini farendi
incurunnàddi dretti che una canna

Pianu pianu giràbami, in callòggu
tutti s’arregini a gudìssi lu mari,
ipirèndi in un gran “ coìpu di canna”
ma nisciunu n’iscia, foramàri

E tandu, pianu, zi semmu avviàddi
in diriziòni di ziddài sussìnca
tra firi di gran màcchini arriggìddi
a manu drestha e puru a manu manca

Pruzissiòni di gran genti in andèra,
n’abemmu visthu di tutti li curori,
tanti in “ cuighìna” e tanti mezzu “cotti”
ma tuttigànti “cotti da lu sori”

Mammi carrendi figliori minori
mezu drummìddi e cu’ lu muccu in nasu
e tanti “curi in tanga”ipassigèndi
zi passàbani propriu a rasu a rasu.

E accòlla abà… una màcchina n’è iscendi
mi pari guasi grazia dumandàdda
e puru la d’affaccu s’è immubèndi
intrèmmu… e , affaccu, un’althra z’è già intràdda!

Zi pusèmmu i’ lu còfanu abbaiddèndi
tanta grazia di Deìu ammuntunàdda
e suipèmmu l’ariètta frizzantìna
di la sera chi andendi z’è in faràdda

E inogghi arribi,’gnora Guardhia mea,
una guardhia sussìnca umbè abbaunzàdda
-Chisthu postheggiu- dizi – è a pagamentu
ma la tassa no è fissa ‘chì è… “alternàdda”

-Vidìmmu un poggu – dizi, a lu d’affaccu
(poi cuntinuèggia, andendi in itarianu)
-Dica signore come chiamerebbe
nel suo dialetto, l’asino nostrano?-

-Aàniu- li ripundisi prontamenti
lu priguntàddu di razza sussìnca.
-Unu e zinquanta finz’a mezzanotti
e poi so’ sedinà l’ora chi manca-

Poi m’ha fissàddu i’ l’occi e ancora ha fattu
chissa prigònta un poggu dibirthènti
ed eu maccu, in pressa a ripundilli
-In sassaresu? “àinu, zerthamènti”-

Signora guardia mea… a vo’ sabellu
cosa ha dittu la guàrdhia disgraziàdda?
-Tre euri tondi finza a mezzanotti
e dizottudinà l’ora iparràdda .

Si m’abussiani puntu cu la sùra
sangu di zerthu no mi n’era isciddu
da cantu vi soggu rimasthu mari
e poi… chissu gran pòschu digraziàddu
m’ha fattu di sintì torra più mari
chi z’ha ipiegàddu chi pa’ li sussìnchi
v’è…la “cuntinuiddài territoriàri”!!!

Masthru Gì
29.7.02