La mappa agghju paldutu
di la mé ciuintura
e no s’agatta
tratta
pa turrà in darétu.

Mi suvveni in un sonniu chi lachési
pezzi di ciuintura illi lamagghj
bòci di cuntintesa illi muntigghj,
paltìcculi di ‘ita illi rasitti
pa brincà illi laccani pruibbiti.

E lu fòcu ha brusgiatu lu rustugghj
undi lu mé sudòri
cu l’ea di lu còri
semp’invanu agghju spaltu
e cu iddhj li zappuli stracciati,
come fiocchi di lana illi caldicci,
di la mé piccinnìa spésa ‘n vanu.

E no torru ‘n daretu chi lu fòcu
laca solu chisgina senz’ammentu.

Caminendi illu ‘entu a occhj a mari
dapòi di cincu chiti agghju ‘ncuntratu
un fòcu spintu a pédi d’un altari
cu un agnulu moltu a mani in gruci.