La me’ ‘igna (romangia)

Mill’aggju lacatu chi lu cori
immez’a l’oldini laurati,
a chissi traci pintati
d’ummidu lintori
e pampana pulpurina
siccata a lu soli d’austu.
Lu nuscu di lu mustu
in chissu laccu culmu,
li cupi lacati a imbuffà
a li primm’ei
e lu lentu ciucchittà
di la suppressa
chi ancora più si strigni,
chena pressa,
come l’ammentu
illi pinsamenti mei.
Mill’aggju lacatu chi lu cori
sutt’a li castagni
ch’aggj’autu cumpagni
da cand’eru minori
e undi ancora currini
infatt’a lu ‘inticciolu
li boci e li canti
d’antichi binnenni
misciati a lu pumà
caldu e gustosu
di la sabba illu paggjolu.
Mill’aggju lacatu chi lu cori
und’è stata la me’ ‘ita
e undi miss’è aultita
la brama chi abà mori
com’e chista stasgioni
chi in cumprì si chjudi
e veni mancu la luci
appianu appianu
ill’asettu d’un dumani
chi cunnoschia,
dilicatu,
un altu branu.

Gianfranco Garrucciu

Gianfranco Garrucciu via A. Lentini n° 3, 07029 Tempio Pausania (SS)