La solti
di Gianfranco Garrucciu

thiesi 2007

Ca’ nasci affacc’a mani in dì sirena
à di lu soli la piena celtittù
ca’ di l’umbra tarrena n’à la viltù
è natu pal campà strint’a catena
si poi no v’à aggrai o silvittù
sarà di tempu bonu la dì piena
ca’ in pen’a lu mundu ‘eni nascendi
cu lu dilliriu anda pruzzidendi.

Ca’ ven’a chistu mundu chen’affasci
tutti li ‘janni abbri chen’impidu
ca’ vidi tribbulatu lu so’ nidu
campa pinendi puru poi chi nasci
aend’a bona solti fatt’affidu
in pasculi bundanti unu si pasci
di scasci campa cal’à lu distinu
di no iscilli avvia solt’in caminu.

Ca’ vidi illu nascì un dì di luci
cunnosci di lu branu li culori
ca’ nascendi no casca illu laori
tandu l’agliola a nudda si riduci
e s’è soli chi a unu lu faori
riflettini mattessi agnati e cuci
ca’ in gruci a la ‘ita si prisenta
in caminà a gjugna passu istenta.

Ca’ tocca ‘a primm’accappiu la fultuna
infattu silla polta illu campassi
ca’ l’à stella riessa in liarassi
illa so’ ‘ita tolta arà la luna
cal’à distinu celtu d’accuppiassi
arà ciurrati boni a una a una
ma s’imbruna lu tempu illu viì
a ca’ pena ghirrendi illu nascì

Anda cussì e chena più mutà
sendi in un vessu chi gjira lu mundu
a cali subbiussiggja e ten’a fundu
a ca’ zedi faori ill’aggjutà
currendi è sempri tutt’in tundu
pal paura chi s’aggja di filmà
ma si fussia ch’aessia di cambià
solu ca’ pena resciarìa a campà.

Gianfranco Garrucciu via Lentini 3 - 07029 Tempio P. Tel. 079670173 – 340 2600285