Cantas mizas e mizas e mizas
de passos
bos han frastimadu e malaittu,
ladros de vida!

Cantas mizas e mizas e mizas
de mamas
bos han improradu debbadas
farfaruzas de diccia
pro sos fizos istratzu carrale!

Ah! Si su tempus esserat
ispada attarzada
cun s’aìru antigòriu
e nieddu che tura
de ànimas isperdisciadas!

Ah! Si sa carrela ’e Damascu
s’abberzerat de nou nessi un’aizu
un’aizu ebbia
a bos bider lughentes de oro
barriados de ludu luadu
a innòriu e birgonza
de s’umanidade,
ladros de vida!

Si de seru solu un’alenu
bos benzerat,
chircadebos chizones de umbra
pro che costoire a s’accua
su pesu iscunscensciadu
chi trazades
e hazis a trazare
fintz’a ue sas lughes de Amore
non connoschen interighinada…

Ma bois cussa die pro sempre
non l’hazis a bider mai,
ladros de vida.
-------

Bennarzu 2016