Lagrimas durches
de Maria Luisa Pisanu

De sa cresia manna in s’ispuntone,
trampas sas dies, che pedulianu,
a ogios bassos tendinde sa manu,
a sa ‘essida ‘e sa funsione.

Sas bestes non connoschene sabone
e de mugheddu lughet su frustanu,
si mai as tentu benes, es lontanu
s’ammentu caru ‘e cuss’istagione.

Cando, in sos seros tebios d’eranu,
sa chigula incuminzada a cantare
e de pizzinnos s’intenden sos zogos,

in su pettus s’azzenden bezzos fogos,
in segus ti custringhene a torrare.
Lagrimas durches falan a pianu.

(menzione d'onore Flussio 2012)