Lambrigas de mele
di Antonello Bazzu

"A su biàdu'e babbu"

Ischintiddas de memoria
che lambrigas de mele
miscendesi a su ràntzigu 'e sa morte
iscaldin su coro 'e su 'etzu.

Ingranind'est su trigu in s’aidatone
e no est tempus ancora 'e messare.

In dies de traschia si paret,
truvend'erveghes, ancora pastore,
peri padros e baddes
o boghende pedra a mina
in cavas de trachite
o boes ghiende, aggiobados,
laòrend’ in terra mala.

Che trazat sos isettos
su carignu malesigu ‘e su tempus.

Istraccas como e bramosas sas manos
chircan sas mias e, ràntziga,
las infundet una làgrima.
Tando cumprendet s'antigu pastore
ch'est arrivida s'ora 'e s'avviare
peri saltos biaittos
m duna tramudantzia chena tempus.

Ispalta in mesu chelu
lu saludat sa luna caritunda.