Lamentos d’una jovana, ingannada da un’amante
di Matteo Madau

OCTAVA IN VERSU OCTOSILLABU

Continu vivo attristada,
Consumende sa persone:
Pro servire a unu Nerone
So dae totu abandonada.

Mischina! Ite no faghía
Pro aggradare a custu ingratu!
Tantu, e tantu l’hapo fattu
Chi como ja’ non so mia:
Passesi sa terachía
Solu cun ipse intretesa,
Et como mi vido presa,
A lu chircare obligada.
Pro servire etc.

Se mi mustresit benignu
Su visu in tanta confianza
Chi obblighesit sa speranza
A lu amare cun impignu:
O male hapat su carignu,
Ch’inserrat in sas intragnas,
Et cun astutas maragnas
Mi tenet sempre inlasada!
Pro servire etc.

Tantu, & tantu mi tractesit
Cun milli varias cautelas,
Et assiduas sentinelas,
Chi die, & nocte mi factesit;
Tantu se mi subjectesit
Cun fingidu rendimentu
Chi ja’ logresit su intentu
De mi tenner humiliada.
Pro servire etc.

Et como trista de me!
Nè mancu bi considero:
T’amo, t’adoro, & venero,
Confidende ancora in te.
De gente foras de se
Est fagher su chi facto eo.
Ingratu! Chi ancora creo
Chi m’amas, no sende amada.
Pro servire etc.

Ingratu! Ite recompensas
M’has dadu de tantu amore?
Nara, fingidu, traitore,
Pr’ite pagas cun offensas?
Pr’ite a su mancu no pensas
In cantu t’hapo istimadu?
Pro Chi troppu t’hapo amadu
Mi tenes, corza, odiada.
Pro servire etc.

Pro dare a ipse sos gustos
Isponzesi honore, & fama,
Disgustesi a babbu, & mama,
Mi comporesi disgustos:
Cun incessantes assustos
Passo sas noctes interas,
Formende varias chimeras,
Chi mi tenen isvariada.
Pro servire etc.