LAMENTOS DE UNU NOBILE

Funesta rughe
chi giutt'a pala
per omnia secula
ba'in ora mala

In diebus illis
m'as fatt'onore
ma oe ses simbulu
de disonore

Oe unu nobile
chi no at pane
senz'arte faghet
vida'e cane

Senz'impiegu
su cavalieri
est unu mulu
postu in sombreri.

A pancia boida,
senza sienda,
pappat che aiunu
paza in proenda:

Deo faeddo
cun cognizione
ca isco it'est
s'ispiantajone.

In illo tempore
cando tenia
richesas,benes
e nobilia,

pappai, petta,
petta 'e vitellu,
frisca, frischissima
dae su masellu.

Oe mi cuntento
de pan'e casu,
cando chi nd'appo,
e binu a rasu.

E,tra parentesi,
gai, pro collunu,
mi narant martire
de su digiunu.

Ah caros tempos
c'appo connottu,
sezis mudados
indunu bottu!

In cussos tempos,
in sos festinos
mi sustentai
de puddighinos.

Pudda chi rassu
faghiant brou,
dogni manzanu
caffè cun ou.

Pranzos de gala,
festinos, ballos,
gorbatta bianca
e guantos giallos.

Cun sa chiterra
in sas carreras,
alzai su cantigu
a sas istellas.

De notte in festas
semper ischidu-
tiriolupedde-

Supervu, a nemos
m'inchinaia,
vantende alteru
sa rughe mia.

Oe sa superbia
no est de mundu
sos pantalones
non giughen fundu.

Sa bacchettina
de sas pius riccas,
s'est cunvertida
in ciappaciccas.

S'aneddu d'oro
de calidade,
est in su monte
de piedade.

E su relezu
cun sa cadena,
mi l'appo endidu
pro una chena.

In cussa chena
funesta e vile,
m'appo giogadu
caddu e fusile.

Torra'a domo
pro pius dolore,
m'ido sa visita
de s'esatore.

Dendemi titulos
de riccu nobile
mi ettat in cara
richezza mobile

Eo li rispundo
in tonu affabile,
richesa mobile
miseria stabile.

Eh gia mi narat,
ma cando mai
lei, cavaliere,
poveru gai?

Sa peronospera
tottu at distruttu,
binzas e campos
non dant produttu.

Quindi, paziensa
tenzat pro como,
li naro, isse
intrat in domo.

E a crebacoro
de sa familia
ponet suggellos
a sa mobilia.

Sa domo no
est rispettada,
pro more d'esser
ipotecada.

Tottu suggellat,
piattos, bottiglias,
ispidos, tribides,
truddas,graviglias.

E provisteddas
c'aia fattas:
basolu, caule,
tzuccas patatas.

lintiza,fae,
lardu,salamene,
lassende in domo
miseri'e famine.

In fines tottu
sequestradu,
eo cun sa rughe
mi so restadu.

Peppinu Mereu