Alenadas de chessa in su ’addiju.
Filos de prata in mesu sas olias.
Faeddos de pasadas pedras bias.
S’àmina lugorosa che ispiju.

Ammajos mudos astringhen in bula.
Sa sedda addae-addae leat seju.
S’ammentu nd’’attit nuscos de mudeju
cun su son’’e sas bamas in s’istula.

Mama a tardu ’e notte posta in pija
suighet su cumassu in fremmentarzu.
Pustis a mattisuja e cantentarzu
istinchiddat sa fache in sa faddija.

Si tott’in d’una tzàcchidat su tronu
cun ìrridos e bentu o ponzat nie,
mirend’a chelu primm’’e fagher die
ispronat s’ebba su massaju ’onu

ca non ammittit pasu su laorzu:
malas e bonas sas dies sun caras.
Sa domo oriolada a resu in laras
che l’accumpanzat fintz’a biradorzu…

Fumentos de ’inistra in su ’addiju.
Dillos de sole in mesu sas olias.
S’abberin subra sas carrelas mias
aeras altas e nues de ghiju.

Giugno 2020

------------------
Lampizos - riverberi, bagliori. ammajos…astringhen in bula - groppo alla gola, commozione. sedda - qui, pianoro, collina. leat seju - che prende forma, appare in lontananza. nuscu/os - profumi, odori. su son’’e sas bamas… - suono dei campanacci delle greggi al pascolo nelle stoppie (istula). post’in pija - modo di dire - predisporsi, prepararsi. suìghere - gramolare, impastare, preparare il pane. cumassu - porzione dell’impasto. mattisuja, martigusa - arbusto, avorniello, ginestra. cantentarzu - erica. fache - qui fiamma, nella bocca del forno (faddija). ìrridu - improvviso e violento scroscio di pioggia, temporale. massaju ’onu - qui nel senso di capace, provetto. laorzu - aratura, seminagioni, ecc. …sun caras - qui preziose, per l’urgenza dei lavori di coltivazione. resu - qui preghiera. biradorzu - proda, girata; punto dove termina e (re)inizia il solco. fumentu/os - qui nel senso di buon odore, profumo. dillu/os - lett. danza, ballo.