Lassami Isvanessire
de Augusto Piras

Lassami solu, chelzo isvanessire
liberende sa mente da s’affannu;
capìtan pagas boltas intro ‘e s’annu
custas raras iscutas de recreu,
chelzo olvidare dogni nuscu feu
sena pentzare, sena concluire.

Nues d’ambaghe mi pesan in bolu,
serenu in baddes mi perdo e in turres
ca sena pesu ti colcas e curres
pigas e calas lompinde a totue;
atere pares o foltzis ses tue ?
ma non t’impoltat, non b’at oriolu.

Nadende in mares a suta ‘e sas undas
in mesu ‘e prendas, de prellas e pisches,
senza nadare, bisonzat chi l’isches!
sena respiros in pinnas de nare.
a bentr’in bassu mi ponzo a mirare
tantas sirenas dechiles e brundas.

In-d-una pelcia m’agato inserradu
in caragolos chi calan a fundu
tando m’arrisco e bintrende in su mundu,
lompo a su mesu tra rocas e grutas.
Mancu suero mancari ch’allutas
siana totu che sole immandradu.

Poi mi giogo in su sole brinchende
pro fagher umbras in tota sa terra
cun-d-una fune ne prendo una perra
e mi la cuo a palas de luna
narant chi custu mi batat fortuna
pro sos machines chi ti soe nende

Ma non ti cretas chi beros non sian
ca totu apo ‘idu in sos pagos momentos
chi m’as lassadu sena pentzamentos
liberu ‘e isterrer in bolu sas alas
bettendemiche a dasegu ‘e sas palas
tutu sas cosas chi in conca mi crian.

Mentzionada in Bonorva "Lassami isvanessire"