LENTOLOS…
1° Premio – sezione rima – Bonorva 2006

Lentolos biancos nidos
che-i sas cussentzias netas…
e tue ch’ancora isetas
a torrare!

Lentolos! Unu mare!
Lughidos isprumatzos
a segare ligatzos
e cadenas

chi atrofizan sas venas,
istuturran su coro
cun sos loros insoro
prepotentes.

Cainos, no’ balentes!
Però fizos de Deus
ch’ an leadu sa peus
caminera.

Lentolos … cun s’ispera
de torrar’a cuile,
a s’antigu jannile
disizadu.

Tue, disonoradu!
Poberu pecadore
chi ti faghes onore
nessi “a fura!”

Lentolos de tristura
da’ora ingalinados,
ammentos de olvidados
ranchizores!

Ispunten chentu frores
in sas malas cussentzias,
dolos e suferentzias
fue – fue!

Benennidos dogn’ue
lentolos de amistade,
de paghe e libertade
insinzidos.

Lentolos coloridos!

Antoni Piras