Pastore-mannu vipo ‘e una gama
de pessos chi creschian in sa mente
che lànticas timian d’isvanire
ca gana e gula aian de ischire
su sentzu costoitu in su naschire.
Pastoricande semper in truvera
cuatu, a bortas, ch’ ‘èstia de ‘era
pastore-banditu m’an custrintu
sos pessos chi cherian tancas mannas
chena trèmenes, muros e cresuras
bundantes d’abbas friscas e pasturas.
A pastore-teracu reduitu
dae pessos istranzos banduleris
una gama ifferrata apo truvatu
chena latte isprumosu e chena lanas
gama romasa de annatas malas.
Pastore-mere mai sulenatu
gherratore d’isprene e de isperas
carigno pacos pessos indurcatos
chin mele rànchidu ‘e merulidone
sutzu ghelatu de gherra e suore.
In locu illacanatu cuntipizo
sos restos de s’ischertu e m’abizo
ch’est tempus de pesare leva noa
de bonas lanas e de bona proa
parande mascros déchitos d’erveche
chi apan corros fortes de defesa
cando chircan sulenu in sas pasturas
de tancas chena muros e cresuras.

"2 premio al 7° concorso di poesia in lingua sarda Circoscrizioni n° 2 e n° 3 di Sassari