Limba de Logudoro
de Mirella De Cortes

Cando t’intendo
mi paret de torrare pipia
e t’iscurto a coro cuntentu.
Che unu isu
bio sa bidda mia e… tutt’in d’unu
pensamentos indromiscados
s’ischidat
po’ m’imprassare a strintu.
… paraulas…
… paraulas…
paraulas imprendadas de coro…
che pipia in su brassolu
mi paret de dromire in bratzos tuos
anninniàd’e su sonu
de sa drucesa de sa limba mia.

T’amo, limba mia,
ses tue chi mi che as pesau,
puru si comènte unu puzòne de niu seo bolada,
e paraulas noas
hant ingurtu su connotu meu,
sidia de regordos,
torro a tie.
In custa vida fuidora
unu disizzu m’abbarat
de t’intendere e de ti fueddare ancora.
T’amo, limba mia,
oe t’intrego custos versos e t’imploro,
cando tue podes, beni a m’agattare,
abarra cun megus,
callentamì su coro.

12° Premio di Poesia “Città di Iglesias” Seconda Classificata Lingua Sarda