Limbas
di Cristoforo Puddu

Limbas
aundhadas atogadas mutzadas
contr'a donzi resone 'e tziviltade.
Limbas
inzendradas dae su coro 'e sa zente
e ispramminadas in s'oscuru 'e sos fundhales.
Limbas
chi curren in su sàmbene 'e su tempus
pro esser rebbotadas dae Istados de Podere.
Limbas
de pópulos chi si cheret cantzellare.
Limbas
de su connotu e de Frantziscu Mannu.
Limbas
de Logudoro e Campidanu.
Limbas
do Pobo Galego e dels Pai'sos Catalans.
Limbas
intregadas a poetas chen'atza
e a imberriados ammuntadores
abbistos solu a oferire sónnios.
Limbas
de suore e traballu
de 'oghes murmutadas in su disterru
in s'ammentu 'e unu cantu a tenore.
Limbas
de fele e amore
de 'ias e abbuturadas identidades
sestadas in sas predas de Sardigna.
Limbas
tragadas che crastos de corazu
a su sole chi at a avrèschere
prò rupere tempos nós.