Logu 'e recreu
de Antonio Sannia

Raras frinas lieras,
lusingan cun amore,
sas fozas de s'albure fioridu;
e in sas camineras,
che perlas de lugore,
naschen bramas d'affettu, de sentidu.
Sas funtanas bundantes,
consolan sos amantes,
chi chircan paghe in su coro feridu.
De domo est s'allegria,
s'incantu, su rispettu e s'armonia

Unu mudore 'e chelu,
imboligat s'aera,
ue s'animu allegru andat in bolu;
bolat finas s'anelu,
su disizu, s'ispera,
tramas sinzeras riccas de consolu,
de belludu, de oro,
chi sa jana, da' coro,
at tessidu comente s'aranzolu,
'ogande da su sinu,
filos lughentes, de seda e de linu.

Cuntentos sos puzones,
si faghene su niu,
indoradu cun petalos de rosa;
brincana sos anzones,
in laccanas de riu,
innidas che s'amore d' una isposa.
In sa tanca sos frores,
sun de raros colores,
paren pintados da' sa mariposa.
Ite logu 'e recreu
po cuare s'istraccu coro meu.........

........e tando disizare
cun tegus de lu poder agattare

Seconda classificata al "Premiu de literaradura Paulicu Mossa - Bonorva" - Poesia in rima
Sezione Anghelu Dettori XIX edizione 2013 dedicada a Giuanne Antiogu Mura.