Lu tempu di la fioridura
Giuseppe Tirotto

La bouganvillea i la corti è furriadda.
Parìa drummidda, accalighjnadda
i la ventri bugghjosa di l'inverru,
dabboi, quasi inzirriadda da la lugi
di brami, è scuppiadda in un verdi
ischiggiaddu, più iscuru manu manu,
cumenti l'amori candu ghjumpa la passioni.
Un amprori di fogli e di fiori,
un assediu di ratti e di tinàggliuli,
un'ispriscioria azzudda
cumenti li dimoni in ghjru a corpu
e pensamenti i li dì di la fiuridura mea.

E pari sempre drummidda, accalighjnadda,
eppuru a dugna branu
torra fugosa più che mai, e pari
quasi voglia intra i lu me' balconi sfiuriddu,
arrugghjà pa' l'appusenti
e pusassi a fiancu a l'anni mei buladdi
cumenti li zii vecchji
a lu cabbizzali di li niboddi maladdi.

Duvarìstia dalli lu benvinuddu,
fammi cuntà li pinsamenti di li stagioni
timmuddi morti, lassammi basgià
da lu so' rispiru inchietu e frescu,
e inveci imbaru tèttaru
cussi illudèndimi di no criscì lu tempu,
né di tuccà li silenzi
chi no si poni isfrancà, in cori meu
asittendi, parò, un altru
so' attoccu, alu branu chi veni,
candu avara scuppià torra di verdi.

(Castelsardo)

Seconda classificata al “Cuncursu de Poesia in Limba Sarda de Tissi – 2008”