Lu vinu
di Ignazio Sanna

A me lu vinu mi piazi billu “al bacio”,
a bocc’ampulla,
ad agasthoru pienu:
no importha sia
zirriagga o cannunaddu
bastha chi tignia l’ugni,
chi sia nieddu.
Lu soggu, no è cosa di signori
chi lu fiaggani prima d’attasthallu
e lu jirani ischaldhendisiru in manu;
l’isciucchiteggiani in bocca a succiaddura,
fazini una faccia ischifilthosa
chi poi s’inciara, pa dichiarà a la fini:
«È un vino a bocca tannico, arrapante…
Insomma… d’accurriatare i denti;
ha certamente un misto di flagranza
e di fragole areste di boscaglia…
di tarassaco forse, di quel fiore
che la plebaglia chiama pabanzolo».
Bah, po’ assé cussì: no pongu linga.
Pa me l’interessanti è chi imbriagheggia
li pinsamenti tutti c’aggiu in cabbu,
c’appoi un litru m’appiania dugna isthragu
e mi fozzia vidè tuttu a curori:
si poi la notti la passu a bazinedda
cun d’una gana manna di bumbà
ca si n’importha, ma par una sera
mi soggu intesu lu paddronu di lu mondu.

Quarto classificato ex-aequo Premio Romangia 2009-2010 – sez. Poesia imbriaga