Los intendo sa notte, che entidade
chi custu coro prenat de ammajos,
sos ojos suos, chin sos dulches raios
chi li lughian pighidos nieddos,
e tessian ispolas de isteddos
in sos telarzos de s' immensidade.

Parian prados d' ervas in fiore
chi s' aperian lentos a manzanu,
e fin un' ingalenu ind' un' arcanu
de nuscu 'e mariposas bola 'ola...
Ca in donzi pessu be fit issa sola
sa prima Luna 'e sos pessos d' amore.

E fin sos fagher nostros primidios
ca fimis birgonzosos e pitzinnos,
e bastaian solu sos atzinnos
chi prumintian mares e incantos
e cuaian penas e piantos
sos oios suos chircande sos mios.

Nos bidiamus a ora e mesu die,
o sos istades a sa passizada,
e si sos seros a s' iscuricada
non ti 'idia o no' mi 'idias
fin solu tristuras e l' ischìas,
ca mi cherìas e cheria a tie.

però si sunu perdios e dispersos
sos sentimentos nostros in s'aèra,
in cue in artu, in carchi caminera
de pianetas e de milli Lunas,
inue si son fattas Nanas brunas*
sas Supernovas in sos universos.

E partidos si sunu sos destinos
chei sos rios chi falan a mare
has fizos e nepodes de istimare
e zeo puru hapo fizos mannos
e sos caddos piccados in sos annos
arressados si sunu che runzinos.

Ma rimirande in chelu sos raios
in custa notte de Santu Larentu
addae-segus torrat un' ammentu
chi sos sos annos binchet e insistit ...
Fortzis est lughe antiga chi resistit
in oios mios fintzas a ammajos.

*Orione

Menzione d’ onore Sezione Monserrato Meridda. Tema imposto Ammajos isteddos - "XXXVII PREMIO LOGUDORO" Ozieri 2018