Luna cara istimada
di Franceschino Satta

Non b’imbezzas abberu,
luna cara istimada.
Sempre pizzinna e bella,
zirella,arta in su chelu.
Mi fis amica prima,
mi ses amica commo.
Prima chin sas promissas
commo chin s’isperanzia.
Chin tecus faveddabo
comente unu pizzinnu
faveddat chi sa mama.
Mi nabas cada cosa
che mastra zenerosa
ch’amat sas creaturas.
E dego t’ iscurtabo
parande sas oricras.
Paragulas amicas,
paragulas d’amore.
Chin sos ocros tancaos,
ischidu, ti pessabo
sonniande cosas raras…
Cabaddos chin sas alas,
musicas delicadas,
chicheras, alipintas e disizos
d’amore tottu intintos.
Ca fit beranu, o luna!
Su beranu s’e sa bida,
cando cada pizzinnu
credet in sa fortuna
e bolat in sos chelos biaittos
chin su cabaddu ’e canna
puntande sa frunzitta a sos isteddos.
Ma commo chi so’ bezzu
no isco ite pedire.
Camino abbellu abbellu,
annotto prus a terra, e solu ispero
de colare sos annos chi mi restan
rispettande su zustu
in brazzos d’unu mundu prus onestu.