Luna… manna e bella,
in mesu a su chelu de Abrile...
E nois ...inoghe ...in custa terra
che frommijas inchietas impressadas
a burulare, riere e pianghere
in s’apposentu caldu de s’amore
o subra s’impedradu frittu de ‘iddia.

Ventanas cunzadas e jannas frisciadas
pro cuare e carignare sos sentidos.
E sa luna… fora… pendulone
subra su filu de su tempus...
chi dechida passat cun misteriu,
bizende sa notte de sos bios
e lughizende… marmaros de losas.

Una ruschida!... S’ora ‘e su campanile
est tocchende… mesanotte
imbarende a murmuttu… s’avreschida
pro nd’ischidare sa lughe
intro sas semidas de su coro.

E currere… currere… a pistare s’erva
de babbaudos, pabareddos e fiores.
Profumu de ervas friscas...
et ‘eo minore… cun sos annos a pala
a m’infundere sos pes’ de biadia
cun su tempus cabuladu in presse.

E tue… luna incantadora,
sighi… a pintare sos bisos de s’anima.

Menzione d’onore al Premio internazionale LOGOS - glesias, 20 Ottobre 2012