Luna di Maggiu
di Gigi Noce

Vai innorammara,inverru!
Tu luna faccitonda unì eri andàdda?
Eri annuzadda(1) addareddu a li nùi
annuzadda cumenti lu me’ còri
Maggiu é turrendi, fammi cumpagnìa
chi soggu soru senza lu me’ amòri.

T’ammentu grassa sobra l’aribàri
chi z’ipiabi fendi la disthratta
tondi li cavani curori di la pràtta
cuntendi li me’ basgi, accùa accùa.(2)

M’ammentu li dizia chistha canzòna:
- Li basgi so’ cumenti la cariàsgia
chi no ti teccia mai; conta l’isthélli...
pa dugna isthella t’aggiu di basgià.

Acchì no resthi ancora un’aizaréddu?
v’hai li labbri e la cara che lu sòri
mi sei fendi brusgià piumoni e còri
pa ticciammi(3) ti debu mussigà.-

Era propriu di Maggiu chissa nòtti
chi z’é buradda cu’ l’ari di lu véntu
ma tu no v’eri in zéru, eri annuzàdda
a cuntà li me’ lagrimi di piéntu.

Passa lu tempu e tu, Luna di Màggiu
cuntinui a cuntrullà l’innammuràddi
chi si n’affuttini si sei abbaiddéndi
e a la to’ luzi... so’ cuntendi bàsgi.

3°premio al “Premio Giovanni Filippo Pirisi Pirino”II Edizione

____________________

1. imbronciata
2. di nascosto
3. saziarmi