Oras de sacrifiziu
seus bivendi
oras de spantu malu
e promissas de badas
ghettadas a tiradas longas de velenu
de mommotis bistius de fradis mannus.

De una tancadura arruinada
criada est sa speranzia
attuffada impari
a fueddus de amori
scarescius aintru bustas grogancias
impari a unu pendenti scambillau
e a sa cascitta sfinigada de Battisti
asutta de su primu reggimigias chi fiat nieddu
immoi totu impruinau de talcu chene fragu
testimongius de is tempus
de is fillus de is froris.

Pagu dinai nci fiat inzandus
pagu dinai ma bisus sinzillus
mancai bisaus casi sempri a sa bona
chene umbras e arrastus de malesa
chi oi trobeddant po finzas dis de soli.

Custu mundu chi si fai bregungiri
non sprigat corus limpius
garotas funti is arrisus
stoccadas is pensamentus
no siddant prus is manus fueddus de onori.

Ma nottesta tostorruda est sa luna
beffiana e pibiruda
luxit amarolla sa genti
mancai siat incrabiada
intremesu a is arrampus
frùscinat spezia bella
po chi su crasi siat scappu
de donnia tirannia.

Segnalazione di Merito al Concorso di Poesia "Quartucciu" - 2016