Luttos de catza
di Augusto Piras

Mattas lentoriadas de piantu,
pintas de su colore de sas venas,
fumantes de tichirrios astrados.
Como chi tottucantos sun cagliados
si che isolbent custas baddes amenas
In ranchidos sucutos de ispantu.

Malmurizadu in-d-una punta ‘e crastu
miras su dannu chi furat sa vida,
s’ultimu alenu de s’amigu caru
chi, pro sa presse de s’ultimu isparu
miradu a s’umbra, a matta infritzida,
finit su tempus… sutta su pirastu…

Intesu no as sos cussizos sanos
chi t’an appoltu sos amigos mastros
e ne sas brigas de sos pilos canos.
Ca si t’esseres fattu catzadore
prima ‘e ti crer bonu isparadore,
sutzessos non bi fun custos disastros.

Tottu tenides gana ‘e fagher proa
pro bos bantare a sero in su tzilleri,
nende ch'azis aggiuntu taca noa
a tistimonza de sa balentia
De l'ochire cun-d-unu colpu ebbia
Creindebos su mezus fusileri.

Sa presse est cumpagna ‘e su discoidu
e de sa malasorte e de su dannu.
aberis su punzu e-d-est boidu,
tempus non l’as dadu d’esser pienu:
ca sa oza de lomper non at frenu,
semenat pro regoller intro ‘e s’annu.

Ognunu torrat tristu a logu sou…
Calat su frittu, si serrat sa nue
Niedda de dolore e de iscuru.
Sulat su entu, in custu sero duru…
Solu sa molte s’abbarrat in cue…
B’at fattu catza… pro meritu tou.

Sune 20 de Bennalzu 2010