Luxi di Amori
de Dante Erriu

Tirandi ’e dogna coru s’arreselu
eterna Pranta Vìrgini ’e s’amori
e po s’eternu manda su lugori
ca ses sa gràtzia de s’imensu celu.

Spraxi s’ìnnidu velu
Divina Mama de s’umanidadi.
Tui, ses sa bundadi,
sa luxi de sa paxi torra allui,
ses sa bundadi, Tui
tirandi ’e dogna coru s’arreselu.

Intregadd’unu frori
a su mundu chi est prenu ’e suferéntzia.
Mama de sa Poténtzia
ispraxi ca ddu podis una prama;
de sa Poténtzia Mama
eterna Pranta Vìrgini ’e s’amori.

Tui ca ses s’Arbori
o Mama de s’Eternu Soberanu.
Dona sempri sa manu
i a dogna pecadori Tui perdona.
Sa manu sempri dona
e po s’eternu manda su lugori

ca prena ses de zelu
chi s’inghias amori i eterna luxi;
abranda dogna gruxi
e ca ddu podis dogna gràtzia manda;
dogna gruxi abranda
ca ses sa gràtzia de s’imensu celu.

Primo Premio al Logudoro 2011 di Ozieri - Sezione Poesia Religiosa