Malissias e difettos de sas feminas
di Pedru Pisurzi

1.
Sos chi feminas chircades
it'est femina no ischides,
su dannu 'ostru faghides
sos chi feminas amades.

2.
Sa femin'est in sustanzia
unu cumpost’ ‘e ingannos,
caus’ ‘e totu sos dannos,
mostru totu in arroganzia,
iscola de petulanzia,
zentru de malignidade.

3.
Arpia in sos pensamentos,
musca de summa molestia,
incorreggibile bestia,
coccodrillu in sos intentos,
frina chi movet sos bentos
de totu sas tempestades.

4.
Basiliscu in su mirare,
rana de vele piena,
de s'altu mare sirena
chi bocchit in su cantare,
furia fatta a ingannare
sas bellas simpiizidades.

5.
Est pudda in sa secretesa,
martinicca in sas assiones,
mare de confusiones,
cristall'in sa fortalesa,
rundine in sa lezeresa,
paone in sas vanidades.

6.
Est funtana de ogni male,
seminariu de ogni vissiu,
iscogliu de precipissiu
e veru puttu infernale,
inimiga capitale
d'onestas proprietades.

7.
Issa est debile de testa
e de geniu istravagante,
de anim'est incostante,
de naturale molesta,
in sos trattos pagu onesta
pront'in sas curiosidades.

8.
Issa est peste, famen, fogu
chi desolat ogni terra,
est acuta lanza in terra
chi destruit ogni logu,
cun sa limba sua a giogu
perturbat comunidades.

9.
Bona no bi nd'hat peruna,
anim'est insupportabile,
animale insazziabile
variabile che luna;
che roda de sa fortuna
mustrat tantas variedades.

10.
Cantas aes hat in s'aera,
cantas hat in su mare renas,
cantos tuddos in sas 'enas
hat s'erv'in sa primavera,
cantos pilos ogni fera
sa femin'hat malidades.

11.
Siat padrona o teracca,
o cojuada o 'ajana,
bestat seda o 'estat lana
de carveddos iss'est fiacca.
Custa est bova, cudd'est macca,
totu sun iniquitades.

12.
O sian bellas o feas,
sian poveras o riccas,
sian mannas o piticcas
totu han malas ideas,
che Dalilas filisteas
sun pien’ ‘e falsidades.

13.
S'est bajana est su zilissiu
de su babb'e de sa mama,
rustica siat o dama
totu sun senza giudissiu,
meda amantes de su vissiu,
de jogos e libertades.

14.
S'est cojuada, pro sa moda
d'immodestas inglesinas,
pellones e cappellinas
e de munneddas cun roda,
cheren un'intera doda
de biddas e de zittades.

15.
S'est battia est vissiosa,
indiscreta e attrivida.
Mesu macca e presumida
in dogni trattu modosa,
devota e religiosa
de terrenas amistades.

16.
S'est mundana est perdissione,
s'est devota est male e peus,
pro chi servin fin'a Deus
cun fìngida devossione
e in ogni condissione
tenen malas voluntades.

17.
S'est pizzinna no hat carveddu,
giovan'est ammacchiada,
bezza est istemperada
in modu, trattu e faeddu,
ma sa limba che bulteddu
hat in totu sas edades.

18.
Unu chi femina leat
pro teracca o pro padrona
cun sas furias de Bellona
continuamente peleat,
peus d'issa non nd'ideat
s'inferr'in sas calidades.

19.
Attenzione, giovaneddos
chi chircades cojuare,
si non cherides errare
non bos incantet aneddos,
firmade bene in carveddos
ca, si no, bos ingannades.

20.
Si no hazis patrimoniu
pro suffrire a tantu gastu
chi cheret su grande fastu
de s'attuale matrimoniu,
cun d'unu veru dimoniu
bois bos accumpagnades.

21.
Preguntade sos cojuados
si no creides a mie:
cantu suffrin nott'e die,
miseros isventurados,
pro s'esser accumpagnados
cun tales bestialidades.

22.
Cantos cantos nde 'idimus
cun sa mesa luna in testa,
ahi, chi muzere onesta
si che nd'hapat no ischimus!
Solu bene connoschimus
chi Santu Lucca hat cunfrades.

23.
Cando sa femina est ricca,
sa chi s'hada pro muzere,
cheret de tot'esser mere,
assoluta signoricca
e che ignominosa ficca
sempr'in ojos la portades.

24.
Cando sa femina est bella,
cudda chi tenides como,
bois tenides in domo
una infausta istella,
ca che santu in sa capella
cortiggiada l'incontrades.

25.
Si est povera ed est brutta
sa chi leades pro isposa,
ahi ite vida penosa
passades cun tale frutta!
In domo manc'un'iscutta
de paghe isperimentades.

26.
Ognun'est tantu maligna
e de tale inclinassione
chi punghen ch'iscorpione
in terra firma, o Sardigna,
funesta mortale insigna
de ziviles sozziedades.

27.
Sas chi paren educadas
sun bellas esternamente,
ma a s'internu che serpente
sun de velen'impastadas,
imprudentes isfacciadas
cun bois si las trattades.

28.
Sa femina in apparenzia
est sepulcru imbiancadu,
de fora bene adornadu
e bella ancora in presenzia,
però brutta pestilenzia
intro totu l'agattades.

29.
Osservade, si cherides,
cando s'omine est bajanu,
sempr'allegru sempr'uffanu
die e notte lu ‘idides,
ma seriu lu connoschides
si cojuadu l'osservades.

30.
Comente no est seriu
su poveru cojuadu,
si sempre vivet ligadu
in orrendu contiveriu,
senza tenner refrigeriu
mancu in sas calamidades?

31.
Cussu sì ch'est cosa grae;
portare muzere a pala,
massimu si tenet ala
d'esser de domo sa jae;
oh Deus! e cale trae
pesantissima tirades!

32.
Sa femina est su retaulu
de sa morte e de s'inferru,
pro chi tenet in s'internu
sas trassas de su diaulu.
E la giamat Santu Paulu
zentru d'infelizzidades.

33.
Sos Battistas istestados,
sos ingannados Sansones,
sos perdidos Salamones,
sos Zuseppes arrestados
sun effettos causados
da tales bruttas deidades.

34.
Ogni femina est imbrogliu
e de s'omine ruina,
de comunes males mina
e de s'innozzenzia iscogliu,
feu e diabolicu fogliu
ch'imparan bruttalidades.

35.
Pro si poder cojuare
bessini foras de tinu,
pro cussu sa testa e sinu
procuran de s'adornare,
tentende gasie isforzare
s'omin'a carnalidades.

36.
Pro cussu tantu isfrenadas
curren a festas e ballos,
pro cussu che pappagallos
faeddan che ispiridadas,
pro cussu tant'affannadas
viven in penalidades.

37.
Ahi! disgrassiadu cuddu
chi de casacca e cabbanu
a issas intrat in manu:
mi l'ispilini che puddu,
in dossu pius unu tuddu
de pilu non l'incontrades.

38.
Sun ambisuas famidas
chi penetran fin'a s'ossu,
piberas chi cun su mossu
faghen mortales feridas,
inimigas d'ogni vida,
amigas d’avversidades

39.
In s’istiu e in s’ierru
transas han de su mazzone,
postas in suggessione
segan a rabbia su ferru,
in libertade o inserru
sempre malas las proades.

40.
Sa prima Eva in sa frutta
perdesit su prim'Adamu,
ei sas fizas cun s'amu
a bois piscan che trutta;
senza rimediu est sa rutta
si de issas bos fidades.

41.
Cantu movet in su mundu
de disgrassias e angustias,
de discordias e porfìas
su infernale profundu,
totu bessit dai fundu
de tales mostrosidades.

42.
Femin'in limba materna
esca sonat de lussuria,
monstr'e infernale furia
indizze de morte eterna,
niedda e brutta lanterna,
accia de mortalidades.

43.
Sa superbia la confortat,
sa vanidade l'azzegat,
sa molestia l'arrennegat,
s'invidia la trasportat,
e sa bellesa la portat
a sas sensualidades.

44.
Ogni femina est in fine
inferru, morte e peccadu,
in sa chi ben'annidadu
s incontrat ogni macchine,
senza chi mai decline'
dae sas bruttalidades.

45.
Tantu connosco in cunsenzia
e tantu devo cantare,
e si cherides proare
cun pius giar'isperienzia,
remitto a sa evidenzia
custas mias veridades.

46.
Si totu su ch'hapo nadu
algunu ch'est falsu narat,
esser cussu si declarat
unu veru effeminadu,
pro chi cant'hapo cantadu
sun veras realidades.