Malu pagadore.

Cantu si ’alet totu su chi tenes
como chi che a mie ses timinde
su contu chi su tempus t’est batinde,
ma pro paga non cheret cussos benes,
ch’in manu ancora astringhes e tratenes
chentz’ischire chi totu t’est fininde.

E nudda contat oro e capitale
chi ses proend’invanu a presentare
a chie t’est pedinde de mustrare
diversa proa e ateru signale,
chi nelzat de intentos e morale
e chi serenu potas cummentare.

Est beru cant’afirmas e propones
nende ch’est de natura su dissignu,
pro su cale cun fortza e cun impignu
richesa as produidu e, a muntones,
a paris de sos mezus campiones
ca che issos de titulos ses dignu.

Ma s’in pius t’agatas calchi cosa,
calicunu, atùa, nd’at de mancu:
sempre si l’at piantu cuss’ammancu
chentz’otenner sa paga doverosa,
su dare ti fit pena dolorosa
che una costa ogada in su fiancu.

Ma, in tantu leare, it’as lassadu?
Penso mi la cunfirmes cust’idea:
su ch’est a cuntrapesu in s’istadea
contat pius o mancu su pesadu,
ma, diversu valore est calculadu
cando non b’est de benes sa trobea.

E tue ch’in cambutzos la tenias
t’est ruta che brujada da-e fogu,
e como ses proendelu su giogu
su matessi chi primu non cherias,
cheres currere che cando podias
ma ti mancan sas fortzas e su logu.

Franco Piga (Romana ‘SS’)
su 3 de aùstu 2007