Como t’ido turpa intro sa gama
chin sa corona in manos e umile
a pes’ispartos cara a su fochile
e chircas pessamentos d’una trama
po dares a su tempus menzus brama
ses sempere grabada chin istile
e dias cherre in s’anima servare
s’umanu sentimentu de mi dare.

E pesso cando t’ido bisionande
si galu cussos sonnios son dorados
o si che son in s’anima servados
in versos imortales chi cantande
son paris chin su tempus e andande
intro‘e cussu coro amadricados
e dias cherre sempere servare
sa grobe in coro po mi saludare.

E pesso cando t’ido sola sola
ma ricca de virtude chin sos annos
s’amentas bisionande sos mal’annos
bestida chin iscarpas a cattola
chi non risentit dies de iscola
fachende de travallos sos prus mannos
in sos critticos tempos ses colada
ma ricca de salude e consolada.

E pesso a tie zega chene luche
chin pricas a furcone cale fruttu
po paca unu vagotto de curruttu
su tempus t’hat porridu chin sa ruche
un’asche chin sas penas de ti juche
in s’ala d’apartares a triuttu.
ma non ti ses arrendia chin sa fide
mi tocas chistionande po mi ‘ide.

Ti deppo custa vida‘emmina santa
formada in zoventude dae s’amore
po custa terra rude su fiore
f’ippi in sos bratzos tuos canta canta
da cando in domo nd’happo postu manta
ti pesso in cuntentesa e in dolore
ti vardo in sos chent’annos in sa corte
e t’auguro annos prus... e menzus sorte.