Onesta e bona, de coro istimada
Mi torras in sos bisos cada tantu
Pro mi brobire lacrimas de prantu
Cando in sa vida irrugo, in sa pigada

De sentimentos sanos, misurada
In su giudissiu mai 'e cundannare
Fis campana pro me de iscurtare
Lughe chi m'at s'andala illuminada

Cantos avertimentos e cussizos
Pro mi crarire s'istrada 'e leare
Pro apagare sos menzus disizos

Apo galu bisonzu 'e t'iscurtare
In custu mundu 'e penas e fastizos
Sighimi a esser s'Istella Polare.