Mamma,
cantos isteddos istanotte!
Dami,
dami sa banchitedda tua,
chi mi nde falo mizas de bratzadas
e in manos,
in cussas manos de pupia ‘ etza,
ti ponzo sos isteddos.
Si tue los carignas,
so cunvintu,
in alvures de paghe
e muntones de pane si cunvertini.
Mamma,
ajò nos setzimus in gianna
e. si tue mi faghes cumpanzia,
det passare unu caddu mannu mannu,
tottu fattu ‘e luna.
Et eo mi lu sezo custu caddu,
e, cun tegus a groppa,
demus attraessare terra e mare.
Pro semenare sos isteddos nostros,
fattos pane e amore.
Mamma,
cantos isteddos!
Ma cantu ranchidore in terra e mare.
E cantos mesudies
Punta a punta no sun de mesanotte!
Mamma,
dami sa banchittedda tua,
nde falo sos isteddos…
Mamma,
custos isteddos, istanotte,
sun ascultende una ruschida dulche
chi pigat dae una banchittedda,
e rien incantados.
Ma no si faghen pane,
ma no si faghen alvures de paghe.