Mamma Mia
di Salvatore Enne

su doighi de martu fit sa die
Barantaduos mill'e noighentos
T'as'ammentare tottu sos momentos
De cando as batidu a lughe a mie
Frades e sorres tottu fin'inie
Pro ti faghere MAMMA cumprimentos
Cun BABBU divididu azis s'amore
Ponindemi a lumen sarbadore

E chissà cant'e canta suferensia
Pro me as'afrontadu mamma mia
Dae sa di'e sa mia esistensia
Ca fit tempus de pest'e caristia
Devias tenner forza e resistensia
Ca su lat'e su sinu fit ebia
Non mi podias no ateru dare
Ca nudda si podiat agatare

Non fit ancora sa gherra finida
E fit trista sa situazione
Non s'agatiat risu ne cogone
Sa zente fiat trista e afrizida
Sa farina a tessera e medida
Ne faisedda ne pisu farzone
In cussos tempos da ora finidos
Finamentas sos ricos fin famidos

As afrontadu d'onzi patimentu
Pro tottu sos c'a mundu nd'as batidu
M'a noisi su zustu nutrimentu
Pro nos campare sempre l'as'apidu
Pro cussu unu mannu monumentu
Podindelu t'aia costruidu
Ca deghe fizzos cun s'amor'e coro
As'allevadu MAMMA e mind'onoro

M'ammento c'andaias a su riu
Pro samunare a nois su estire
B'andaias in zerru e in istiu
Cun tott'a coddu lear'e batire
Sa lavatrice arrivat a tardiu
E cun issa sa machina e cosire
Cosas de gai no ndasa connotu
Tue a brazzu nos faghias totu

Cando si sun sos tempos cambiados
E finzas sos zeunzos fin finidos
Nos semus in su pagu consolados
E bell'e gai che semus creschidos
Nos amos postu aneddos in didos
E tottu nos ar bidu isposados
In domo nostra felic'e cuntentos
Ma cominzan in te sos patimentos

Tot'isposados mannos e minores
E bona parte lu fimis fizados
Cando a tie ti sun cominzados
Cussos feos e ranchidos dolores
Chi nemmancu sos menzus professores
A ti curare sunu resurtados
Pro cussu MAMMA mia prima e s'ora
Che ses partid'a s'eterna dimora

A sessanta ses annos Mamma mia
Barant'otto de vida nuziale
Chi Babbu t'at leadu a s'ispidale
Pro ti curare cussa maladia
Ma nemmancu cun sa pregadoria
De Babbu pro su Deus immortale
T’aiat cussu male alleviadu
Deusu a su chelu t'at cramadu

Bolotana, 28-07-2011