Mandighemus e buffemus
Naschidu ses Gesus
in sa conchedda
ca sos omines
chi ses bennidu
a servare
non t'ant cherfidu
retzire
in dom'issoro.
Como chi tantu tempus
est passadu
e mandigant atatos
ogni bene
aggoglire
non ti cherent
in sas domos.
Tue gia l'ischis
chi como
mancu bi creene
a sa ennida tua.
E pruite ses bennidu?
Ite che faghes?
Inue ti tucas?
Su Chelu
pro zente meda
est unu contu
pro pitzinneddos.
Semus chena pastores
e chena gruttas
semus bestidos
bene
e amus puru
sa televisione
su tzellurare
so temosifones
e su computer.
Si ses naschidu
abberu
duamiza annos
a oe
como non podes
naschere
che tando
da una pitzinna
de idda furistera
bajana e mama
a su matessi tempus.
Gesus
tando, magari no,
ma como
semus intelligentes
e amus totu:
domos
machinas
aereos
naves
e campamus
a longu.
A l'ischis
chi dae innoghe
a pagu
no amus mancu
a morrer?
Nessi nois europeos
non faeddemus
de sos americanos
de subra e de suta
e de sos tzinesos
e de sos indianos
a mata franca
mandigamus!
A l'ischis
chi como
amus finza
sa pintzione?
Ite che faghes
in custu mundu
a dies de oe?
Ti pones
a pianghere?
Cheres nascher
pro fortza?
A lu cheres
unu cunsizu?
Bae a naschere
in sas periferias
de Roma
de Parigi
de New York
da Brasilia
de Buenos Aires!
In cue
podet esser
chi t'aggogliene
cantende
"Tue falas
dae sas istellas!"
Ti fetant sa grutta
cun sos pastores
e sos tres res.
Si ponzant a pianghere
a mesanotte
in puntu
ca issos
an s'anima
e su coro.
Malestidos suni
e male postos
non t'aisettes meda.
Solu nois
como podimus
mandigare
che sete canes
a mata franca
in custa notte
bianca.
Mandighemus
e buffemus
custu est tempus
nostru.
Imbreagos
che suppa
nos corchemus
a rorchida
sonniemus.
Sa Missa 'e mesanotte
a sos credulones
e a sos bigotos
lassemus!
Sos cantigos
de Nadale
a sos pitzinnos
e a sas bajanas e betzas
e a calchi mama
batia
iscultare lassemus!