Ite ermosu est su mundu
mirau cun s'innotzèntzia
de unu pitzinnu chena malidade.
Ma s'abbàidas a fundu,
abbizu e cun passèntzia
tue podes biet cal'est sa beridade.
No bies solu colores
de puzones o frores,
ma bies cun sa sabiesa de s'edade:
ingurdos chi po 'inare
semenant pore e ispinghent a odiare.

Lezimos in s’Istoria
c’an' fattu sas fronteras
pintande in d'una mapa su cunfine,
guvernos chena glòria,
nos an' postu in sas venas
sàmbene malu, infettu, chena fine
de òdiu, de ratzismu
e de natzionalismu,
ispraghios in su mundu cun mudine,
e como in custa Terra,
no b'at die chi no si movet gherra.

In desertos e in mare,
caminat chen' ispera,
una mìsera e afflitta umanidade,
chen' ischire a inu' andare,
fuia de una galera,
in logos inu' est morta sa piedade,
vagabundos viandantes,
pòberos emigrantes,
in chirca de cristiana caridade,
invetze agatant rughes,
ca s'egoismu lis at cuau sas lughes.

Ma si su fadu est custu,
mantene s'isperàntzia,
cumbàtti galu e non disperes mai,
S’impreas s'intellizèntzia,
lompet su tempus zustu,
e s’ora ‘ona est arribende giai.

_____________

Quant’è bello il mondo
visto con l’innocenza
di un bambino senza malizia.
Ma se guardi a fondo,
ben sveglio e con pazienza,
tu puoi vedere quale è la verità.
Non vedi solo colori
degli uccelli o dei fiori
ma vedi con la saggezza dell’età:
avidi che per soldi
seminano paura e spingono ad odiare.

Leggiamo nella Storia
che hanno fatto le frontiere
disegnando il confine in una mappa,
governi senza gloria,
ci hanno iniettato nelle vene
cattivo sangue, infetto senza fine
di odio, di razzismo
e di nazionalismo,
sparsi in silenzio nel mondo,
ed ora in questa Terra,
non c’è giorno che non ci sia una guerra.

Nei deserti e nel mare,
cammina senza speranza,
una misera e afflitta umanità,
senza sapere dove andare,
scappata da una galera,
in posti dove è morta la pietà,
vagabondi viandanti,
poveri emigranti,
in cerca di cristiana carità,
invece trovano croci,
perché l’egoismo le ha nascosto le luci.

Ma se il destino è questo,
mantieni la speranza
combatti ancora e non disperare mai.
Se usi l’intelligenza,
arriva il tempo giusto,
e l’ora buona sta già arrivando.