Manzanu de su duamiza
di Gianfranco Rosa

Custu manzanu, un atteru isettu
Paret chi tenza, appenas ischidu;
Su segundu millenniu s'est finidu
E su terzu bintradu nd'est derettu.

It'at suzzessu? Su monte fioridu
Ad esser... e su chelu prus nettu?
S'omine no ad aer prus difettu...
Su mundu tott'in paghe cunvertidu?

In fora, sas nues sun ammuntande
Sos saltos, cun sulidos de iddia,
E dogni zente sighit su calvariu!

Tottu sighit comente fuid andande.
Su duamiza ha boltadu, in bidda mia,
Solu sos foglios de su calendariu.