Fint in color’ ‘e mare
sos ojos de Maria,
ma cando in fundu a issos miraias
podias sebertare
un’umbra ‘e timoria,
e cumprender puite non podias.
Ca nudda connoschias
de su penare sou
po s’amore suffertu,
chi postu l’at in chertu
sos sentidos, tenìndesi in costou
sinnos de violèntzia
de una mente infusta ‘e prepotèntzia.

L’ant agattada in terra,
chen’àlidu de vida,
insambenada e briva de s’ispera
de ‘ìnchere sa gherra,
pérdida e chena ‘essida,
de poder render dótzile una fera.
De ànimu sintzera,
cun fide chircaiat
sos dìligos carignos,
cun in sinu disignos
de affettu e ternura, e bi creiat.
Ma fint totu in debadas
cussas durcuras suas, fuliadas.

Fint longos e nieddos
sos pilos de Maria,
li calaiant lìsios in palas.
Fit de pagos faeddos
e disizosa ebbia
de una lughe in mesu ‘e umbras malas.
Como at postu sas alas
e ch’est bolada attesu
in chelos biaittos,
ube a sos melmos frittos
su cheghentu ‘e s’amore l’ant atzesu.
In sa terra at lassadu
su coro ‘e una fémina truncadu.

____________

Maria

Avevano il colore del mare
gli occhi di Maria,
ma quando li guardavi in fondo
potevi scorgere
un’ombra di paura,
e non potevi capirne il motivo.
Perché nulla conoscevi
del suo penare
per l’amore sofferto,
che le ha messo in conflitto
i sentimenti, tenendosi nascosti
segni di violenza
di una mente intrisa di prepotenza.

L’hanno trovata distesa per terra,
senza segni di vita,
insanguinata e priva della speranza
di vincere la guerra,
persa e senza sbocco,
di poter rendere docile una belva.
Con sincerità d’animo,
cercava con fede
le delicate carezze,
con nel petto intenti
di affetto e tenerezza, e ci credeva.
Ma erano tutte vane
quelle sue dolcezze, buttate via.

Erano lunghi e neri
i capelli di Maria,
le scendevano lisci sulle spalle.
Era di poche parole
e desiderosa soltanto
di una luce in quelle ombre malefiche.
Ora ha messo le ali
ed è volata lontano
in cieli azzurri,
dove alle membra fredde
hanno acceso il tepore dell’amore.
Sulla terra ha lasciato
il cuore spezzato di una donna.

11 dicembre 2017

Menzione d’onore alla 31^ Edizione del Premio di poesia “Antoni Andria Cucca” – OSSI 14 aprile 2018